سعيك محفوظ في ذمّتنا
كل عرض ينسجّل باسم صاحبه، وكل تمرير ينسجّل باسم اللي مرّره وبالوقت. ولما تتم الصفقة، السعي يروح للي سعوا فعلًا، مو لأول واحد عنده سكرين شوت.
الصفقات الكبيرة تمشي بالواتساب، والحق يضيع معها
التجاوز
تكشف الموقع أو اسم المالك، وواحد يدخل بينكم ويروح للمالك مباشرة. وسعيك يطير.
بدون إثبات
السلسلة فيها ٤ أو ٥ وسطاء، والاتفاق بالكلام. ولما يصير خلاف، دليلك الوحيد سكرين شوت.
العرض المكرر
نفس الأرض عند عشرة وسطاء بعشرة أسعار. المشتري الجاد يتعب، والمالك يفقد السيطرة على أرضه.
أربع خطوات، كلها من الواتساب
سجّل عرضك
ترسله للبوت: الحي والمساحة والسعر. والموقع والصك واسم المالك يبقون مخفيين.
انشر رابطك
بدل نص العرض، تنشر رابطك الخاص. وكل وسيط يمرره ياخذ رابط باسمه، مربوط برابطك.
المشتري يوقّع
المشتري يتحقق من جواله ويوقّع تعهد عدم التجاوز، وبعدها بس تنكشف له التفاصيل.
السعي لمن سعى
عند البيع، النظام يتتبع المسار من المشتري لين يوصلك، ويوزع السعي على اللي في المسار بالنسب المتفق عليها.
كل طرف ياخذ اللي ينقصه اليوم
دورك مثبت بالتاريخ والوقت
- عرضك باسمك من أول لحظة
- نسبة السعي متفق عليها قبل التمرير
- تقرير إثبات جاهز لو صار خلاف
- تختار: عرضك مفتوح للشبكة أو بالروابط بس
أرضك ما تنكشف للسوق كله
- الموقع واسمك ما يشوفها إلا مشتري موقّع
- عرض واحد واضح بدل عشر نسخ
- ما يوصلك إلا الجادين
عرض حقيقي من مصدر واحد
- تعرف مين الوسيط الأساسي ورخصته
- ما تدوخ بين أسعار مختلفة لنفس الأرض
- وسيطك واحد، وحقك واضح
سجل ما أحد يقدر يعدّل فيه، حتى إحنا
كل خطوة تنحفظ ومعها بصمة رقمية مربوطة بالخطوة اللي قبلها. لو أحد غيّر أي سطر، السلسلة تنكسر والتلاعب ينكشف. ولكل عرض تقرير إثبات يبيّن مين سجّل، ومين مرّر من مين، ومين جاب المشتري، ومتى.
مصمّم يكمّل عقود الوساطة الإلكترونية في منصة الهيئة العامة للعقار، ويربط كل وسيط برخصة فال حقته.
اللي يسألون عنه الوسطاء
لازم أنزّل تطبيق؟
لا. كل شي من الواتساب: تسجّل وتضيف عرضك وتاخذ روابطك من محادثة مع بوت ذِمّة.
مين يستحق السعي؟
اللي على المسار من الوسيط الأساسي إلى الرابط اللي سجّل منه المشتري. اللي نشر وما وصل منه المشتري ما يُحسب في هذي الصفقة.
كيف ينقسم السعي؟
الوسيط الأساسي يختار طريقة التقسيم وقت تسجيل العرض: بالتساوي، أو نص للأساسي والباقي بالتساوي، أو يتفقون عند الإغلاق. وكل وسيط يوافق عليها قبل ما ياخذ رابطه.
لو المشتري وصله العرض من وسيطين؟
الحق لأول رابط سجّل منه المشتري، وتبقى محمية لمدة محددة. وأي محاولة من مسار ثاني تنسجّل في السجل.
كم التكلفة؟
التجربة مجانية. وبعدها نسبة بسيطة من السعي، وما تنخصم إلا لما تتم الصفقة.
بياناتي وين تنحفظ؟
على خوادم داخل المملكة، وما تنكشف تفاصيل أي عرض إلا لمشتري متحقق وموقّع. التفاصيل في سياسة الخصوصية.
التجربة بالدعوة، وتبدأ بوسطاء الأراضي في الرياض
عبّ الطلب، ونتأكد من رخصتك ونتواصل معك. ولو عندك دعوة من قبل، كلّم البوت مباشرة.